𝐊𝐚𝐝𝐞𝐭𝐞𝐬 𝐅𝐨𝐮𝐧 𝐏𝐍𝐓𝐋 𝟐𝟎𝟐𝟔 𝐁𝐞𝐬𝐢𝐤 𝐏𝐮𝐛𝐥𝐢𝐤𝐚! 𝐊𝐚𝐧𝐝𝐢𝐝𝐚𝐭𝐮 𝟏𝟐.𝟖𝟕𝟕 𝐇𝐞𝐢𝐧 𝐑𝐞𝐳𝐮𝐥𝐭𝐚𝐝𝐮 𝐑𝐞𝐭𝐞𝐬𝐭𝐞
SMNewsTL.com | Dili, 15 Setembru 2026 — Rezultadu reteste no reverifikasaun dokumentus ba kandidatu kadetes foun PNTL 2026 besik atu publika, hafoin Sekretariadu Reverifikasaun Dokumentus konklui ona nia servisu ba total kandidatu 12.877.
Komisáriu Prezidente Júri ba Reteste Rekrutamentu Vaga PNTL 2026, Komisáriu Asistente Polísia José Soares, hateten katak prosesu reverifikasaun dokumentus konklui ona, no rezultadu aprezenta ona ba Komandante-Jerál Polísia Nasionál Timor-Leste (PNTL) no envia ona ba Ministériu Interiór.
“Sekretariadu halo nia servisu no konklui ona reverifikasaun dokumentus, apresenta ba Komandante-Jerál Polísia Nasionál Timor-Leste no envia ona ba Ministériu Interiór. Instrusaun hosi Ministériu Interiór tenke publika ona. Kumpri ba orientasaun ida-ne’e, ami sei entrega rezultadu reverifikasaun dokumentus ba Jornal da República ba kandidatu 12.877,” dehan José Soares.
Nia subliña katak reverifikasaun dokumentus hala’o bazeia ba Konstituisaun RDTL no Diploma Ministeriál N.º 35/2026, ho prinsípiu méritu, transparénsia, akontabilidade no kredibilidade.
José Soares mos garante katak durante prosesu reverifikasaun dokumentus, laiha intervensaun hosi individu ka parte ruma ba servisu Sekretariadu.
“Durante ami halo servisu, laiha individu ida mak interven ba servisu Sekretariadu. Ami nia servisu halo tuir lei no independente,” nia afirma.
Ho prosesu reverifikasaun dokumentus konklui ona, kandidatu sira ne’ebé prense rekezitus sei kontinua ba etapa tuirmai, mak Prova Kultural.
Júri husu ba kandidatu sira atu hare didi’ak sira-nia naran iha lista tuir munisípiu. Se iha objeção ka problema kona-ba rezultadu, kandidatu sira bele hato’o reklamasaun iha loron lima (5), hahú hosi data publikasaun.
Publikasaun rezultadu ne’e sei sai momentu importante ba kandidatu 12.877 sira ne’ebé hein hela oportunidade atu kontinua prosesu rekrutamentu kadetes foun PNTL tinan 2026.