Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH,Ph.D halo abertura ba jogu Xadres ne’ebé realiza iha areadór Kampus Sentral nian, hodi selebra Dies Natalies UNTL nian ba dala 25, no jogu Xadres nu’udar jogu dahuluk husi jogu modalidade footsal no voleibal iha, Kampus Central, Díli (10/10)

Iha abertura Reitór hatete, jogu ida ne’e ho objetivu atu treinu pensamentu tátika no jogu ida ne’e kria mos amizade entre dosente, estudante no funsionáriu sira. Tanba ne’e husu ba kompetitor sira bele aproveita jogu ne’e ho di’ak.

“Agradese ba partisipasaun kompetitor sira nian, tanba kompetisaun ne’e treina ita nia kapasidade tátika no matenek no jogu ne’e ho objetivu hodi komemora aniversariu UNTL nian ba dala 25, maibé atividade komemorasaun hahú ona iha loron 14 fulan Fevereiru tinan 2025 ho kuda ai oan iha areadores São João Paulo Tasi Tolu” dehan Reitór João

Tuir Prezidente Komisaun Organizadora ba Dies Natalies UNTL nian, atual Visereitora ba Asuntu Estudantil nian, Dra. Lígia Tomás Correia hatete, kompetisaun Xadres nu’udar alvo ida ba ambitu komemorasaun dies natalies Universidade nian, espera katak kompetitores sira bele iha konsetrasaun di’ak, hodi joga ho di’ak.

“Jogu ne’e ita konsidera hanesan saúde mental nian, tanba bele treina ita nia pasiensia, pensamento analítiku, espera katak imi bele iha konsentrasaun di’ak hodi joga ho di’ak, nune’e ita bele defini se mak sai manan na’in” dehan Visereitora

Partisipa iha abertura ne’e, Visereitór ba Asuntu Akadémiku no Garantia Kualidade, Profesór Samuel Venâncio de Sousa Freitas, no kompetitór sira komportu husi Dosente, Funsionáriu no estudante sira.

#TimorLeste #UNTL #JogoXadres 10 Outubro 2025

Média UNTL: Leonia de Araújo da Costa
Foto Leonia de Araújo da Costa