RCLM Baucau (13/10/2025)—Delegadu Prezidente juri husi sekretario Nasional hamutuk ekipa PNTL Munisipiu Baucau, fo teste kultural ou ezame ezkrita ba kadetes foun atus hitu neen nolu resin hat (764) iha Eskola Sekundariu Jeral Numeru 2 Vila Nova Baucau, enkuantu nain sanolu resin hat (14) la tuir ezame eskrita tamba la maraka prezensa, tamba kadetes ne’ebe mak liu iha selesaun primeiru hamutuk 778.

Segundu Komandante Munisipiu Baucau Superintendente Asistente Policia Fasio de Jesus Lima hateten, iha prosesu provas kultural ba kadetes foun ne’e parte fiskalizador nain rua mak akompaña to’o remata, wainhira iha prosesu ezame nia laran mak kadetes foun sira mosu iregularidade, parte komisaun sei elimina kedas husi teste kultural ne’e.

Segundu komandante husu ba kadetes foun sira ne’ebe partisipa ona iha ezame kultural ne’e, kontinua prepara an ho didiak hodi partisipa iha teste Fisiku bainhira liu iha teste kultural.

“Mensagem ba kandidatu sira ne’ebe tuir hela ezame kultural mak ne’e rejultadu ne’e mai husi imi an rasik atu pasa la pasa ne’e resposta mai husi imi, karik ida ne’ebe mak lakon laos lakon, maibe tempu mak seidauk sei iha tan tempu sira seluk ne’ebe ita hein labele hein be lakon ita halo fali problema no deskontente depois agora dadaun luta ba servisu ka aktividade ruma lakontinua labele, maibe simu ho pasensia simu ho domin tamba rejultadu ne’e mai husi imi rasik”. Dehan Segundu Komadante Munisipiu Baucau Domingo, 12/10/2025 iha ESJ 02 Vila Nova Baucau.

Entertantu kadetes foun sira sente kontente tebes partisipa iha teste kultural ne’e,  tamba teste lao ho diak no seguru ho nunee kadetes foun husu ba komisaun rekrutamentu atu Labele hamosu sistema familiarizmu.

“Hau sente kontente no orgullu tebes, tamba bele liu iha selisaun primeiru no kontinua mai teste Kultural espera ha’u bele liu hodi kontinua ba teste seluk no hau rekomenda ba komisaun sira atu labele hamosu sistema familiarizmu”. Haktuir kadetes foun

Materia ne’ebe mak fo teste ba kadetes foun sira hamutuk pontus 50, kompostu husi materia Tetun Portugues Istoria Geografia Matematika no Konstituisaun RDTL.

Tuir observasaun Jornalista iha Tereinu nota katak, situasaun Jeral hahu ezame to’o remata Lao ho diak tamba hetan seguransa masimu husi Membru PNTL Munisipiu Baucau no Batalaun Orden Publiku.

Ekipa Kobertura : RCLM Baucau