TITULU : Eventu Loron Munidiál Fase Liman

JORNALISTA : Hermenegildo Dos Santos

EDITOR :Jil Santos

EDISAUN 10/10/2025  ====================================================================

Segunda-feira ne’e Autoridade Munisípiu Liquiçá hamutuk ho Edukasaun Munisípiu no Servisu Saúde Munisípiu Liquiçá ne’ebé suporta husi parseria Mary Mackillop Today realiza eventu Loron Munidiál Fase Liman iha Salaun Parókia São João de Brito Liquiçá ho tema hamutuk aselera asaun asegura moris saudável ba ita nia aan no ita nia familia liu-husi fase liman.

Country Director Mary Mackillop Today Alipio Baltazar explika eventu ne’e hanesan parte promosaun saúde públiku atu promove hodi hasae koñesementu estudante no komunidade nian oinsa atu aprende pratika fase liman ho lolos.

Vise Ministru Saúde Flavio Brandão alerta ba nivel hotu-hotu katak fase liman laos eventual maibé tranforma asaun ida sai hanesan kultura moris.

Direktor Diresaun Nasionál Edukasaun Inklusivu Asaun Sosial Eskolar Joaquin Martins (dneiase) lori Ministériu Edukasaun nia naran hato’o solisita ba Mary Mackillop Today ne’ebé suporta no apoiu Ministériu Edukasaun iha area Saúde Eskolar nian.

Iha Selebrasaun eventu Loron Munidiál Fase Liman ne’e hetan partisipasaun husi Vise Ministru Saúde, Direktor Diresaun Nasionál Edukasaun Inklusivu Asaun Sosial Eskolar, Diretora Geral Ministériu Saúde, Direktora Infordep, representante Komandante PNTL Munisipal, estudante ho manorin sira husi Eskola Ebf no Ebc inklui komunidade tarjetu sira.

 

 

 

TITULU : Transforma Asaun Fase Liman Sai Hanesan Kultura Moris

JORNALISTA :Hermenegildo Dos Santos

EDITOR :Jil Santos

EDISAUN 10/10/2025 ====================================================================

Vise Ministru Saúde husu Autoridade no Professores atu transforma asaun fase liman ba sosiedade sira sai hanesan kultura moris. Lia hirak ne’e hato’o iha Eventu Loron Munidiál Fase Liman iha Munisípiu Liquiçá.

Vise Ministru Saúde Flavio Brandão alerta ba nivel hotu liu-liu ba Professores no Xefi Suku sira atu enkoraja estudante no Komunidade sira atu abitua transforma asaun fase liman sai hanesan kultura moris.

Representante Administrador Munisípiu Liquiçá Renato Nunes Serrão husu ba Autoridade Suku ho Directores Eskola sira atu kontinua habelar imformasaun nune’e bele hasae progresu Saúde Eskolar nian ba estudante sira.

Objetivu husi eventu ne’e atu promove Edukasaun Saúde ne’ebé sustentável nomos tau importansia ba pratika ijiene fase liman hanesan ábitu ba moris lor-loron.

 

 

TITULU : Autoridade Munisípiu Agradese Ba Parseria MMT

JORNALISTA :Hermenegildo Dos Santos

EDITOR ; Jil Santos

EDISAUN 10/10/2025   ====================================================================Representante Administrador Munisípiu Liquiçá agradese ba parseria Mary Mackillop Today (mmt) neébe  realiza Eventu Loron Munidiál Fase Liman iha Salaun Parókia São João de Brito Liquiçá.

Representante Administrador Munisípiu Liquiçá Renato Nunes Serrão hato’o agradese ba Vise Ministru Saúde, Representante Ministériu Edukasaun liu-liu ba Mary Mackillop Today (mmt). Renato Nunes Serrão husu atu kontinua nafatin programa ne’e ba futuru.

Iha Eventu Loron Mundiál Fase Liman ho tema Hamutuk Aselera Asaun Asegura Moris Saudável Ba Ita Nia Aan No Ita Nia Familia Liu-Husi Fase Liman.