Universidade Nacional Timor Lorosa’e (UNTL) liuhusi Gabinete Pro-Reitór Para os Asuntos Coperação (PRAC) servisu hamutuk ho Fundo de Desenvolvimento do Capital Humano (FDCH) distribui Bolsu Estudu ba Estudante ho Defisiénsia (EhD) na’in-19 (sanulu resin-sia) iha Auditóriu Kampus Caicoli, Díli (10/10).

Pro-Reitór Para os Asuntos Coperação (PRAC) Profesór Tomé Xavier Jerónimo hato’o agradese ba Diretór Ezekutivu FDCH nian ne’ebé esforsu hodi oferese bolsu estudu refere ba estudante sira ho kategoria defisiénsia no UNTL.

‘’Bolsu ida-ne’e esforsu boot ida ne’ebé ami halo ba imi-nia interese, ha’u espera katak imi uza didi’ak opurtunidade ida-ne’e atu bele konklui imi-nia estudu ho susesu, tanba imi-nia susesu sai ita hotu nia susesu atu iha futuru imi mós bele kontribui ba rai ida-ne’e ho imi-nia matenek no enkoraja nafatin imi atu estuda ho di’ak”, Dehan Profesór Tomé.

 

Iha fatin hanesan Diretór Ezekutivu FDCH Sr. Júlio Aparício hatete, estudante ho kondisaun difisiénte heta

n

 atensaun espesial, tanba ne’e bele hetan opurtunidade ida ne’e bele motiva sira atu nafatin estuda ho di’ak.

 

“Ha’u husu ba imi tenki estuda halo di’ak atu hatene servisu, tanba dalaruma ema izola imi hanesan defisiénsia, ne’e duni imi aan rasik labele izola tan imi-nia aan, tanba ne’e mak liuhusi bolsu ida ne’e atu suporta imi bele hatudu ba ema hotu katak imi mós bele, ne’e duni imi tenki estuda makaas liutan atu bele kontribui ba rai ida-ne’e”, Dehan Diretór Aparicio.

 

Estudante Bolseira Martinha Gomes husi Faculdade de Direito hato’o agradese tebes ba FDCH no UNTL ba opurtunidade di’ak ne’e hodi apoiu finansa ba estudu durante iha banku universitáriu nian nomós sei esforsu atu bele estuda hodi hetan valór ne’ebé di’ak.

 

“Agradese tebes ba opurtunidade di’ak ne’e, tanba bele apoiu ami-nia estudu sira durante iha banku universitáriu nian,

 ami mós sei esforsu atu bele hakas aan estuda makaas hodi kumpre didi’ak regras sira ne’ebé ami tenki tuir husi UNTL no FDCH nian. Liuliu ami bele hetan notas ne’ebé di’ak atu submete ba UNTL no FDCH hodi ajuda ami kontinua estudu”, Dehan Martinha.